ردي على ناصر الفراعنه (سيارتي يا سيارتي)

سيارتي سيارتي .. لا التيما ولا كابريس
وصليني حارتي بعد ما اعشّق وادوس


وصليني حارتي بس لا اسمع لك حسيس
دام صوتك مايشابه لبربرة الجموس



وصليني صاحبٍ في ذرى بيته حبيس
لا تعرّض للهوى ولا تعرّض للشموس



يعني لاجيت أوصفه .. يشبه الدرّ النفيس
بس لايـِـشرى ولا يْباع لو بأغلى الفلوس



درةٍ لي خالصة .. يوم صرت الْها عريس
في الحيا والطيب تلقي على حوا دروس



بعدها أبغى خط .. لاخط أبها ولا الخميس
خط مكة لاجل عمرة تطيب بها النفوس



ثم اعرّج يم ربعٍ ليا حمْي الوطيس
يرفعون الراس ويدينهم تجتثّ روس



من وقع في ايدينهم حرب .. ذاك اتعس تعيس
ومن وصل ليدينهم سلم .. تفداه النفوس



دارهم في عالية نجد وان جيت بتقيس
من يسار جبال ويمينها عرق الطعوس



ثم مرجعنا على شارع الحيّ الرئيس
بين ناسٍ نصفهم خلف شاشتهم جلوس



والليالي ماضية جمعةٍ والا خميس
والحياة محددة والأجل فيها يروس



والنهاية وَحدةٍ لا جليس ولاونيس
والعمل ينجيك في يوم للكافر عبوس